Қостанай облысында екі адам заңсыз бағалы металдарды іздеумен және өндірумен айналысқан, деп хабарлайды Kaztoday.kz.
Бас прокуратураның баспасөз қызметінің мәліметінше, Қостанай облысының Жітіқара ауданының екі тұрғыны Аққарға ауылы маңындағы Оңтүстік-Тохтаров кен орнында заңсыз бағалы металдарды іздеп, өндірумен айналысқаны анықталған.
«Қостанай облысы Жітіқара ауданының прокуратурасы шекара қызметімен бірлесіп, Аққарға ауылы маңындағы Оңтүстік-Тохтаров кен орнында бағалы металдарды тіркеусіз және рұқсатсыз іздестірумен, өндірумен айналысқан ауданның екі тұрғынын анықтады», – делінген сейсенбі күні таратылған хабарламада.
Сот олардың әрқайсысына 55 380 теңге айыппұл салып, жалпы құны 5 миллион теңгеден астам металл іздеуші құрылғыларды тәркіледі.
«Заңсыз кен қазу – экологиялық тепе-теңдіктің бұзылуына алып келуі мүмкін елеулі заңбұзушылық. Сондықтан заң мен тәртіпті сақтау – экологияны қорғау және табиғи балансты сақтауда маңызды қадам», – деп атап өтті Бас прокуратура.
