Сотталғандар 165 әйелді зорлап, өртеп жіберді, деп хабарлайды Kaztoday.kz.
Конго Демократиялық Республикасының (КДР) Гома қаласындағы түрмеден қашу кезінде ер адамдар әйелдер қанатындағы барлық сотталған әйелдерді зорлап, кейін оны өртеп жіберген. Бұл жөнінде CNN хабар таратты.
Қылмыскерлер бұл жаппай қашуды 27 қаңтарда, елдің армиясы мен M23 көтерілісшілер альянсы арасындағы қақтығыс кезінде жоспарлаған.
Нәтижесінде 4 мыңнан астам ер адам түрмеден қашып кеткен. 165 әйелдің барлығы зорланған, ал өрттен тірі қалғандар саны небәрі 9-13 аралығында.
БҰҰ да, Конго билігі де бұл оқиғаға қатты алаңдаулы.
Конгоның байланыс министрі Патрик Муйяя 165 әйелдің зорланғанын растаған. Ал үкімет бұл қатыгездікпен жасалған қылмысты қатаң түрде айыптайтынын мәлімдеді.
БҰҰ-ның адам құқықтары жөніндегі Жоғарғы комиссары басқармасына өткен жұмада Конго әскерилерінің басқа да зорлық әрекеттеріне қатысты жаңа мәліметтер түскен.
«Біз Оңтүстік Киву провинциясында Конго әскерилері тарапынан жасалған 52 әйелге қатысты зорлық-зомбылық әрекеттерін, оның ішінде топтық зорлау туралы хабарламаларды тексеріп жатырмыз», – деп мәлімдеді БҰҰ-ның өкілі Джереми Лоуренс.
