Алматыда жасөспірімді белгісіз біреулер көлікпен алып кетіп, 5 миллион теңге талап еткен, деп хабарлайды Kaztoday.kz.
Алматы облысы ПД ұйымдасқан қылмысқа қарсы күрес басқармасының мәліметінше, Балқаш ауданы Миялы ауылының 42 жастағы тұрғыны кәмелетке толмаған баласын белгісіз адамдардың алып кеткенін полицейлерге хабарлаған.
Тұрғынның сөзінше, осы жылдың 8 ақпан күні сағат 15:00 шамасында Қызыл-Қайрат ауылында жасөспірім ұлын күштеп Hyundai Elantra автокөлігіне отырғызып, белгісіз жаққа алып кеткен. Оның сөзіне қарағанда, күдіктілер баланы ұрып-соғамыз деп қорқытып, 5 миллион теңге талап еткен.
– Аталған факті бойынша бопсалау бабы бойынша қылмыстық іс қозғалды. Тергеу барысында күдіктілердің жәбірленушіні интернетте жеке видеосын таратамын деп қорқытып, бопсалағаны анықталды – деді полицейлер.
Тәртіп сақшылары жедел-іздестіру шаралары ұйымдастырған. Нәтижесінде күдіктілер 500 мың теңгенің бір бөлігін алу кезінде қолға түсірген.
Бүгінде олар уақытша ұстау изоляторына қамалып, тергеу амалдары жүргізілуде.
