Перизат Қайратқа мүгедек балаларға орталық саламын деп 22 миллион теңге жымқырды деген айып тағылды, деп хабарлайды Kaztoday.kz.
Бұл жөнінде Қаржылық мониторинг агенттігі төрағасының орынбасары Жеңіс Елемесов мәжіліс кулуарында мәлімдеді.
«Қаңтарда қосымша бір дерек тіркелді. Ол мүгедек балаларды оңалтуға арналған орталық ашамын деп аукцион ұйымдастырып, 22 миллион теңге қаржы жинаған. Бірақ қаржыны өз қажетіне жұмсаған. Барлық дерек бойынша жымқырылған қаржыны қоса есептедік. Бұл қаражатты, бұған дейін айтқанымыздай, жеке үй, көліктер мен пәтерлер сатып алуға жұмсаған», – деді ол.
Перизат Қайратқа қатысты істі тергеу наурыздың басында аяқталады, дейді агенттік өкілі.
Елемесов оның анасының да күдіктілер қатарында барын айтты, ол қамауға алынбаған.
