Гүлнар Қайратқызы Үржар аудандық ауруханасына төртінші баласын босану үшін барған еді, бірақ үйіне қайта оралмады. Отбасы дәрігерлерді немқұрайлық танытты деп күдіктенуде, деп хабарлайды Kaztoday.kz.
КТК телеарнасының хабарлауынша, дәрігерлер 34 жастағы үш баланың анасын және оның жаңа туған сәбиін аман алып қала алмады. Туыстарының айтуынша, Гүлнар ауруханаға түскенде өзін жақсы сезінген. Алайда аурухана қабырғасында не болғаны әлі белгісіз. Ресми тұлғалар «қайтымсыз асқынуларды» алға тартып отыр, бірақ тергеу жұмыстары жүріп жатқандықтан, толық мәлімет берілмей отыр.
Абай облыстық денсаулық сақтау басқармасы басшысының орынбасары Әсем Орынбаева оқиғаға қатысты түсініктеме берді:
«Өкінішке қарай, әйелді құтқарып қала алмадық. Босану кезінде қайтымсыз асқынулар пайда болды. Қандай асқынулар екенін айта алмаймын, себебі қазіргі уақытта қылмыстық іс жүргізілуде. Тергеу барысында мәліметтер жарияланбайды. Бізге де толық ақпарат берілмей отыр. Сот-медициналық сараптама нәтижесі бойынша түпкілікті диагноз анықталады», — деді ол.
Orda мәліметінше, оқиғадан кейін ауруханаға арнайы комиссия келіп, бірқатар заң бұзушылықтарды анықтады. Нәтижесінде, бас дәрігерге қатаң сөгіс жарияланып, оның орынбасарларына қызметтерінен өз еркімен кету ұсынылды. Ал оқиғаға қатысы бар дәрігерлер уақытша жұмыстан шеттетілді. Дегенмен, қайғылы оқиғаға тап болған Гүлнардың туыстары мұнымен келіспейді. Олар әділ тергеуді талап етіп, басты сұраққа жауап іздеуде: Гүлнар мен нәрестені аман алып қалуға болар ма еді?
Марқұмдардың нақты өлім себебін сот-медициналық сараптама анықтайды.
