Ақмола облысында баланы азаптап өлтіріп, төрт жыл жасырды деген әйел мен өгей әжесі сотталды, деп хабарлайды Kaztoday.kz.
КТК телеарнасының ақпаратынша, Щучье қаласында асырап алған 2 жасар баласын азаптап өлтіріп, қылмысын 4 жыл бойы жасырып келген әйел сотталды. Баланың өгей әжесі де заң алдында жауапкершілікке тартылды.
Өткен жылы көктемде баланы асырап алған анасы мен әжесінің бүлдіршінді қатыгездікпен өлтіргені белгілі болған.
Бес бала асырап алған отбасында бір балақайдың басы жарылып ауруханаға түседі. Сол кезде қамқоршысы шатасып, ауырған баланың емес, өлген баласының туу туралы куәлігін апарған. Басы жарылған баланың жарақаты оқыс құлағаннан емес, әдейі ұрғаннан болуы мүмкін деп күдіктенген тәртіп сақшылары тексеріс жүргізсе, асырандылардың бірі төрт жыл бұрын көз жұмған. Оның мүрдесін жер үйдің ауласына көміп тастаған. Сотта әжесі кінәнің бәрін өз мойынына алып 21 жылға сотталса, шешесі 4 жыл 6 айға бас бостандығынан айрылды.
«Кухаль Надежда Васильевна қорытынды сот үкімі бойынша 21 жылға бас бостандығынан айрылсын. Өмір бойына педагог қызметін көрсету мен кәмелетке толмаған балалармен жұмыс істеу құқығынан айрылсын. Ал Трофимова 4 жыл 6 ай мерзімінде бас бостандығынан айырылып, кінәсін орта деңгейдегі қылмыстық атқару мекемесінде өтесін», — дейді Ақмола облысы қылмыстық істер жөніндегі мамандандырылған ауданаралық сот судьясы Дархан Бейісов.
