Сот Өскемен әкімін митингіге рұқсат бермегені үшін кінәлі деп тапты, деп хабарлайды Kaztoday.kz.
Шығыс Қазақстанда белсенді Леонид Карташев бірыңғай уақыт белдеуіне қатысты митингіге шыққысы келіп жергілікті билікке хабарландыру берген. Алайда қала әкімі жиынға рұқсат етпеген. Сондықтан белсенді сотқа жүгініпті. Нәтижесінде судья әкімді белсендіге бір ай ішінде митинг өткізуге мүмкіндік беруге міндеттеді.
– Әділ шешім оңайлықпен келген жоқ. Сот отырыстары үш айға созылды. Мені қала әкімдігімен келісімге келіп, арызымды қайтарып алуға бірнеше рет шақырды. Осылай етсем, акция өткізуіме рұқсат бермекші екен. Бірақ айтқанымнан қайтпай, табандап тұрып алдым, – деді Леонид Карташев.
Судья шешімінде қала әкімінің белсенді акциясын шектеуі «заңсыз» деп жазылған.
