Таиландта туристер отырған катер жарылды, деп хабарлайды kaztoday.kz.
ТАСС ақпаратынша, оқыс оқиға Таиландтың оңтүстігіндегі Пхукет провинциясындағы Майтон аралының маңында болған.
«Туристік катер Майтон аралы маңында жарылды. Онда Қазақстан мен Ресейден келген 31 турист болған. Оқиға кезінде 30 турист судың ішінде жүзіп жүрген. Бір ресейлік турист бортта қалған. Ол күйік алып, ауруханаға жеткізілді. Қалған 30 турист жарақат алмады. Қонақүйлеріне қайтты», – делінген полиция ақпаратында.
Қазақстанның сыртқы істер министрлігі катердегі жарылыстан қазақстандық туристердің зардап шекпегенін мәлімдеді.
«Катердегі жолаушылардың арасында Қазақстанның 4 азаматы болған. Олардың барлығы дін-аман, Таиландта демалыстарын жалғастыру туралы шешім қабылдады. Екі азаматтың төлқұжаттары жанып кетті. Ертең консул оларға уақытша құжаттарды ресімдеп, сонымен Қазақстанға орала алады», — деп хабарлады СІМ ресми өкілі Айбек Смадияров.
