Қарасай ауданында өртенген автокөлік табылып, оның ішінен адамның күйген сүйектері анықталды, деп хабарлайды kaztoday.kz.
Orda.kz мәліметінше, оқиға орнынан түсірілген видео «Письма Президенту» Telegram арнасында жарияланды. Ақпарат бойынша, көлік 31 наурыз күні демалыс аймағының маңынан табылған.
Алматы облыстық полиция департаментінің мәліметінше, кісі өлтіру фактісі бойынша сотқа дейінгі тергеу басталған.
«Жедел-іздестіру шаралары барысында 43 жастағы күдікті анықталып, ұсталып, уақытша ұстау изоляторына қамалды. Қылмыстың барлық мән-жайын жан-жақты зерттеу үшін қажетті тергеу әрекеттері жүргізіліп жатыр», – делінген хабарламада.
Полиция әзірге қылмыстың мән-жайын ашып айтқан жоқ. Алайда әлеуметтік желілерде тараған ақпаратқа сәйкес, ұсталған азамат өзінің бизнес әріптесін балғамен басынан ұрып өлтіріп, кейін ізін жасыру мақсатында мәйітті көлігімен бірге өртеп, қашып кеткен болуы мүмкін.
