Әйгілі «Менің атым Қожа» фильмінде басты рөлді сомдаған Нұрлан Сегізбаев ауыр дертпен күресіп жатыр, деп хабарлайды kaztoday.kz.
Бұл туралы журналист Жанар Канафина жазды.
— Балалық шағымыздың символына айналған Қожаны сомдаған актер — Нұрлан Сегізбаев (Санжарұлы) бүгінде ауыр сырқатпен күресіп жатыр. Оның айтуынша, дәрігерлер оған ХОБЛ (өкпенің созылмалы обструктивті ауруы) ауруының 4-дәрежесі диагнозын қойған және жарты жыл ғана уақыт беріп отыр, дейді журналист.
Қазір 75 жастағы Нұрлан Санжарұлына қаржылай көмек ауадай қажет. Бұл қаражат ем-дом мен өмірінің соңғы істерін аяқтау үшін керек. Журналист әзірге ақшаны қайда аудару керегін білмейтінін жеткізді.
Жанар Қанафинаның сөзінше, бұған дейін актер ұзақ жылдар бойы ұстаздық еткен, алайда қазіргі денсаулығына байланысты жұмыс істеуге қауқарсыз. Ол тәулігіне 14 сағат тыныс алу аппаратында отыруы керек.
— Бұл жаста қандай жұмыс болсын? Мен тек аман жүрсем деймін, дейді актер журналиске.
Нұрлан Санжарұлы Сегізбаев — қазақ киносының тарихында «Менің атым Қожа» фильмі арқылы ел есінде қалған актер. Ол 1963 жылы түсірілген аталмыш фильмде Қожа есімді басты кейіпкерді сомдап, миллиондаған көрерменнің жүрегінен орын алған. Фильмдегі шынайы ойыны мен бала бейнесіндегі еркіндігі арқылы ол кеңестік кезеңдегі балалар киносының жарқын өкіліне айналды.
Фильмдегі рөлі оның алғашқы әрі басты актерлік жұмысы болды. Кейін актерлік жолды жалғастырмағанымен, Нұрлан Сегізбаев ұстаздық қызметпен айналысқан, білім беру саласына үлес қосқан.
Дереккөз: @ztb_qaz
