Ұлытауда көпбалалы ана дәрігерлер анестезия салғаннан кейін қайтыс болды, деп хабарлайды kaztoday.kz.
Марқұмның туыстары оның өліміне дәрігерлерді кінәлап отыр. Сондай-ақ осы ауруханада ақ халаттылардың науқастарға салғырт қарауының салдарынан бірнеше рет адам өлімі болғанын айтып дабыл қақты.
КТК мәліметінше, 42 жастағы Гүлнұр Жұанышбаеваға аппендицитті алып тастау операциясы жасалуы керек болған. Алайда әйелге анестезия енгізілгеннен кейін анафилактикалық шок, артынша кома және ми ісінуі пайда болған. Ота жасамас бұрын пациенттің қант деңгейінің жоғары екені және қабыну процесі бары анықталған. Бірақ туыстарының сөзінше, оған аллергияға сынама да жасалмаған. Сонымен қатар, дәрігерлер әйелді толық тексермей, наркоз енгізгенін айтып отыр.
— Операцияға дейін 4-5 сағат уақыт болды, ол ес-түсінде еді, оны Қарағандыға алып баруға болар еді. Біздің ауруханада ондай мүмкіндік жоқ. КЩС-картридждері жоқ, КТ-аппараты істемейді, натрий хлориді, кальций хлориді секілді қарапайым шығын материалдары да жоқ. Мұның бәрін өздері құжаттарында көрсеткен. Аудандық орталық ауруханада осындай жағдай қалай болуы мүмкін?! Бұл — немқұрайдылық, — дейді марқұмның ағасы Мәқсат Қасқатаев.
Гүлнұрдың артында күйеуі мен төрт бала қалды, кенжесі үш жаста. Қазіргі уақытта марқұмның жақындары сараптамалар жасату үшін құжат жинап жатыр. Кінәлілер жазасын алуы тиіс дейді олар.
Аудандық аурухананың жұмысына қатысты тұрғындар пікір білдірді.
— Дәл бір жыл бұрын менің ұлым да осы ауруханада аппендицитті алып тастаған соң көз жұмды. Бұл қандай аурухана, қарапайым нәрсені де емдей алмай ма?! Біз бұған дейін де сан мәрте жүгіндік, облыстық денсаулық сақтау басқармасына, министрлікке хат жаздық. Оларға бәрібір. Мына адамның әйелі өлді, баласы диагнозбен туды. Тағы не болуы керек, бұл былықты көру үшін? — дейді ауыл тұрғыны Меруерт Тамабекова.
Улытау облысы денсаулық сақтау басқармасы аталған жағдайдан хабардар екенін айтты.
— Біз жаңа, жас директор алып келдік. Болашақта мұндай оқиғалар бұл клиникада қайталанбайды деп үміттенеміз. Денсаулық сақтау басқармасы клиниканы ретке келтіру үшін жұмыс істеп жатыр. Қазір кадр мәселесімен айналысып жатырмыз. Екі ай ішінде аурухананы мамандармен толықтыруға тырысамыз, — деді Улытау облысы денсаулық сақтау басқармасы басшысының орынбасары Еркебұлан Бейсембаев.
Көпбалалы ана Гүлнұр Жұанышбаева қайтыс болғаннан кейін аурухана директоры, оның орынбасары, хирург және анестезиолог жұмыстан шеттетілді.
Ал марқұмның туыстары дәрігерлерді сотқа бермек.
