Асқазанын күйдіріп жіберген: Көкшетауда энергетик ішкен жасөспірімге ота жасалды, деп хабарлайды kaztoday.kz.
16 жастағы жасөспірім кенет ішінің қатты ауырып тұрғанын айтып ауруханаға түскен. Оған Көпбейінді облыстық балалар ауруханасының дәрігерлері жедел және күрделі ота жасаған. Мамандардың сөзінше, энергетикалық сусындарды жиі ішу ішкі ағзалардың ауыр зақымдануына алып келген.
«Балада асқазанның тесілген жарасы және жайылған іріңді перитонит анықталды. Мұндай ауыр диагноздың себебі – энергетиктерге әуестік.
Жасөспірімді күрделі оңалту кезеңі күтеді, енді денсаулығы бұрынғыдай болмайды. Асқазанда тыртық пен жара іздері қалады», – деді хирургия бөлімінің меңгерушісі Ернар Қожабеков.
