«Астана – Жезқазған» бағытындағы пойызда қыз бала дүниеге келді, деп хабарлайды kaztoday.kz.
Бұл туралы «Жолаушылар тасымалы» АҚ баспасөз қызметі мәлімдеді. «ҚТЖ»-ның хабарлауынша, жүкті келіншек толғағының басталғанын сезіп, жолсеріктерден көмек сұраған. Әйел жүктіліктің соңғы кезеңінде болған.
Пойыз бастығы Киікбай Маханов пен вагон жолсерігі Алтынай Ғафиуллина шұғыл әрекет етіп, босануға жағдай жасаған. Сондай-ақ Сәтпаев қаласынан шыққан фельдшер мен балабақшада жұмыс істейтін жолаушылар да босандыруға көмектескен. Пойыз бригадасы мен жолаушылардың үйлесімді әрекетінің нәтижесінде 06:20-да қыз бала аман-есен дүниеге келген.
Жеңіс станциясына жедел жәрдем тобы алдын ала шақырылып, пойыз келген бетте ана мен жаңа туған сәби медициналық бақылауға алынған.
