Атыраулық әйел енесін өлтірді деген күдікке ілінді, деп хабарлайды kaztoday.kz Stan.kz-ке сілтеме жасап.
Сұмдық оқиға Атырау облысы Қызылқоға ауданындағы Жасқайрат ауылында 27 мамыр күні болған.
39 жастағы әйел 83 жастағы енесін пышақтаған. Оны дер кезінде аудандық ауруханаға жеткізіп, дәрігерлер аман алып қалуға тырысқанымен, кейуана қайтыс болған.
Аудан әкімі Абат Ақбалашұлының сөзінше туыстар арасында тату қарым-қатынас болған.
«Бұған дейін ене мен келін арасында кикілжің орын алмаған. Оқиғаның не себепті болғаны белгісіз. Тиісті органдар айналысып жатыр. Оқиға кезінде күйеуі үйде болмаған. Ерлі-зайыптылардың бес баласы бар. Ең кенжесі бір жарым жаста», – деді ол.
Қазіргі таңда күдікті қамауға алынған. Қылмыстық іс қозғалып, тергеу жүріп жатыр.
Ювеналды полицияның мәліметінше, күдіктінің екі кіші баласы әкесінің келісімімен Атыраудағы сәбилер үйіне уақытша орналастырылған.
