Батыс Қазақстан облысы Сырым ауданы Жымпиты ауылында 4 маусымда күндіз бір отбасының бес баласы қаза болды, деп хабарлайды Kaztoday.kz.
Болжам бойынша, олар газдан уланып мерт болған болуы мүмкін деп жазды “Мой город” сайты.
БҚО денсаулық сақтау басқармасының мәліметінше, балалар аудандық ауруханаға жедел жәрдем көлігімен жеткізілген. Алайда, дәрігерлер қолдан келгеннің бәрін жасағанымен, олардың өмірін аман алып қалу мүмкін болмады.
Сырым ауданы әкімдігі таратқан ақпаратқа сәйкес, 15:00 шамасында жеке тұрғын үйден өрт шыққаны туралы хабарлама түскен. Құтқарушылар оқиға орнына бес минут ішінде жетіп барған. Үйдің шамамен 30 шаршы метр аумағында тұрмыстық заттар мен жиһаздар жанған. Балалар өрт шыққан кезде үй ішінде ес-түссіз күйде табылып, кейін ауруханада қайтыс болды.
Қайтыс болған балалардың ең үлкені алты жаста болған. Қалған төртеуі – 2020, 2021, 2023 және 2024 жылы дүниеге келген.
Анықталған мәліметке сәйкес, отбасы бұл үйде жалдап тұрған. Өрт кезінде ата-аналары жұмыста болған.
