Қазақстанның авиациялық әкімшілігі Таяу Шығыстағы күрделі геосаяси жағдайға байланысты отандық әуе компанияларға бірқатар елдің әуе кеңістігін пайдалануға уақытша тыйым салды, деп хабарлайды Kaztoday.kz.
Ресми мәліметке сәйкес, Иран, Израиль, Ирак, Иордания, Сирия және Ливан елдерінің үстінен ұшуға шектеу қойылды. Бұл шешім азаматтық авиацияға төнген қауіптің жоғары деңгейіне байланысты қабылданған.
«Қалыптасқан жағдайға байланысты Таяу Шығысқа жолаушылар тасымалын орындайтын әуе компаниялар өз рейстерін осы елдердің әуе кеңістігінде жүзеге асырмай, айналып ұшады», – делінген Авиациялық әкімшілік таратқан хабарламада.
Тыйым отандық әуе тасымалдаушылардың жолаушылар мен экипаж мүшелерінің қауіпсіздігін қамтамасыз ету мақсатында енгізілді. Бұл шара халықаралық авиациялық қауіпсіздік стандарттарына сәйкес қабылданып отыр.
