Қазақстанда ер адам әйелін өлтіруге тапсырыс берген, деп хабарлайды Kaztoday.kz.
Павлодар облысында ер адам қызғаныш және мүлік дауларын себеп қылып, бұрынғы әйелін өлтіруге тапсырыс берген. Бұл қылмысы үшін ол 3 миллион теңге төлеген. Құдай сақтап, әйел аман қалды.
Павлодар облысының қылмыстық істер жөніндегі мамандандырылған ауданаралық сотының мәліметінше, былтыр Б. бұрынғы әйелі Г.-ға бақылау жасайтын адамды тауып беру үшін М.-ға жүгініп, сыйақы ретінде ол 1 миллион теңге төлеген. М. осы мақсатта Б.-ның шарттарына келіскен Д.-ны тапқан.
«Кейіннен Б. қызғаныш пен мүліктік мәселеге байланысты бұрынғы әйелін өлтіру үшін М. арқылы Д.-ны жалдаған. Сыйақы 3 000 000 теңгені құраған. 2024 жылғы 18 маусымда таңертең Д. Павлодар қаласы Баратбаев көшесінің бойымен жүріп келе жатқан Г.-ны күтіп тұрып, оны артынан қуып жетіп, оның кеудесіне және бетіне бірнеше рет пышақ сұғып алған. Алайда, бұрылыстан көлік шығып қалғандықтан, ұсталып қалудан қорқып, қылмыс орнынан қашып кеткен. Уақытылы медициналық көмек көрсетудің арқасында Г. тірі қалған», — делінген сот хабарламасында.
Сотталушылардың қылмысы толығымен дәлелденген.
Сот әр сотталушыға қылмыстық-атқару жүйесінің орташа қауіпсіз мекемелерінде 11 жыл 3 айға бас бостандығынан айыру жазасы тағайындау жөнінде шешім шығарды. Сондай-ақ олардан жәбірленушінің пайдасына жалпы сомасы 8,8 миллион теңгені құрайтын моральдық шығын мен өкілдің қызметі үшін өтемақы өндірілді.
Үкім заңды күшіне енген жоқ.
