Көпір жобасы алғаш рет 2022 жылы қолға алынған болатын. Алайда алғашқы мердігер — «СтандартОйлКЗО» ЖШС өз міндеттемелерін толық орындамағандықтан, келісімшарт сот тәртібімен бұзылды. Кейін өткізілген конкурстың нәтижесінде жаңа мердігер – «Нұрлы Тау ЛТД» ЖШС анықталып, құрылыс жұмыстары қайта басталды.
Жалпы ұзындығы 2,5 шақырымды құрайтын бұл автожол III техникалық санатқа жатады. Қазіргі уақытта нысанда 70 дана свайға бұрғылап бетон құю, 3 ростверг, 2 ледорез, 2 ригель мен 2 тіреу салу жұмыстары орындалған. Сонымен қатар көпірге жалғасатын жолдарды көтеру мақсатында топырақ төсеу жұмыстары да жүргізілуде.
2024 жылы республикалық бюджеттен бөлінген 758,4 миллион теңге құрылыс жұмыстарын жалғастыруға бағытталған. Қаржыландырудың тұрақты болуы – жобаның алға жылжуына айтарлықтай ықпал етіп отыр.
Көпір құрылысы өңірдегі көлік қатынасын айтарлықтай жақсартпақ. Жоба толық аяқталғаннан кейін Жанкент, Бірлік, Қожабақы, Аранды, Бозкөл, Тасөткел, Лақалы, Ажар, Тасарық және Кәукей ауылдарын байланыстыратын жол қауіпсіз әрі үздіксіз қатынауға мүмкіндік береді. Бұл – шамамен 12 мыңға жуық тұрғынның өмір сүру сапасына тікелей әсер ететін инфрақұрылымдық бастама.
Жақында осы құрылыс нысанында Парламент депутаттары Руслан Рүстемұлы мен Мұрат Нәлқожаұлымен бірге жүргізілген мониторинг барысында жұмыс барысы мен сапасына ерекше назар аударылды. Халықтың көптен күткен жобасы ретінде бұл көпірдің уақтылы әрі сапалы пайдалануға берілуі – басым міндеттердің бірі ретінде атап өтілді
