Тамыз айының әрбір екінші жексенбісінде елімізде құрылыс саласы мамандарының кәсіби мерекесі аталып өтеді. Осыған орай Қазалы ауданында мерекеге орай салтанатты жиын өтіп, құрылысшыларға құрмет көрсетілді, деп хабарлайды Kaztoday.kz.
Құрыш қолды құрылысшылар мен сала ардагерлері қатысқан шарада аудан әкімінің міндетін атқарушы Жалғас Сүйеубаев сөз сөйлеп, мәртебелі мамандық иелерін кәсіби мерекелерімен құттықтады.
Жалғас Оңғарұлы жауапты міндет жүктелген мамандықты меңгеріп, қазыналы Қазалы жерінің көркеюі жолында талмай еңбек етіп жатқан бір топ құрылысшыларға аудан әкімінің міндетін атқарушының «Алғыс хатын» табыстады. Сондай-ақ құрылыс саласының ардагері Елубай Аңсатбаев Қазалы ауданының «Құрмет грамотасымен» марапатталды.
Мерекелік шарада аудандық ардагерлер кеңесінің төрағасы, Құрметті құрылысшы Оразғали Бекпанов пен сала ардагерлері сөз сөйлеп, мерекеге орай ізгі тілектерін жеткізіп, игі шараны ұйымдастырушыларға шынайы ризашылықтарын жеткізді.
Сондай-ақ құрылысшылар мен сала ардагерлерінің құрметіне Р.Бағланова атындағы мәдениет орталығының өнерпаздары әсем әннен шашу шашып, мерекелік көңіл күй сыйлады.
