Қазалы ауданының делегациясы тәжірибе алмасу мақсатында Түркістан облысының Отырар ауданында іссапарда болды, деп хабарлайды Kaztoday.kz.
Іссапар барысында делегация мүшелері «Таймас 2024» шаруа қожалығының егін егу жұмыстарының барысымен танысты.
Аталған қожалық бүгінде заманауи әдістерді қолдану арқылы ауыл шаруашылығы саласында жаңа жетістіктерге қол жеткізуде. Нақтырақ айтқанда, шаруашылық 60 гектар күріш, 2600 гектар мақта алқабын тамшылатып суару технологиясымен суландыруда.
Бұл тәсіл су үнемдеудің тиімді құралы болып саналады. Себебі тамшылатып суару жүйесі өсімдіктің тамырына қажетті мөлшерде ылғал жеткізіп, артық шығынды болдырмайды. Сонымен қатар өнімділікті арттырып, жердің құнарлылығын сақтауға мүмкіндік береді.
Аудан диқандарының бұл сапары тәжірибе алмасуға, ауыл шаруашылығында жаңа технологияларды енгізу бағытындағы жұмыстарды жетілдіруге жол ашты.
Айта кетейік, делегация құрамында ауданымыздағы шаруашылық құрылымдарының басшылары барды.
