Аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссияның кезекті отырысы өтті. Жиынға аудан әкімінің орынбасары, комиссия төрағасы Дәурен Тлеумбетов жетекшілік етті.
Қоғамның өзекті мәселесі – жасөспірім тағдыры
Комиссия күн тәртібінде бүгінгі қоғамды алаңдатып отырған ең өзекті тақырыптардың бірі – жасөспірімдер арасындағы ерте жүктіліктің алдын алу мәселесі қаралды. Сондай-ақ бұған дейінгі отырыстарда қозғалған тұрмыстық зорлық-зомбылық, жасөспірімдердің жыныстық қол сұғушылық қылмыстарының құрбанына айналуы, оларға көрсетілген құқықтық әрі психологиялық көмектердің нәтижелері де талқыланды.
Жиында аудандық көпбейінді орталық аурухана бас дәрігерінің орынбасары Сейілхан Артықбаев пен аудандық полиция бөлімінің ювеналды полиция тобының аға инспекторы Мархабат Бегалиева өз баяндамаларын жасап, жасөспірімдердің құқықтарын қорғауда атқарылып жатқан жұмыстарға тоқталды.
Комиссия төрағасы Дәурен Тлеумбетов бұл мәселенің қоғам үшін аса маңызды екендігін атап өтіп, жасөспірімдердің құқықтарын қорғауда әрбір мекеме мен ата-ананың жауапкершілігі жоғары болуы тиіс екенін жеткізді. Ол аудандық білім бөліміне нақты тапсырмалар беріп, оқу орындарында мамандардың қатысуымен семинар-тренингтер мен кездесулер ұйымдастыруды міндеттеді.
Бұл кездесулердің мақсаты – қыз бала тәрбиесі мен ерте жүктіліктің алдын алу, суицид пен зорлық-зомбылыққа жол бермеу, жасөспірімдердің психологиялық және әлеуметтік дамуына қолайлы жағдай жасау, сондай-ақ ата-аналарды бала тәрбиесіне көбірек көңіл бөлуге үндеу.
Жиында бұған дейін комиссия қарауында болған жасөспірімдердің қазіргі жағдайы да сөз болды. Төраға комиссияда қаралған әрбір істің ұмыт қалмай, үнемі бақылауда болуы тиіс екенін ескертіп, балалар тағдырына бейжай қарамау – баршаға ортақ міндет екенін қадап айтты.
Жас ұрпақ – ел ертеңі. Олардың өмір жолына дұрыс бағыт сілтеп, құқықтарын қорғау – қоғам алдындағы үлкен жауапкершілік. Комиссия отырысында айтылған ойлар мен қабылданған шешімдер жасөспірімдердің жарқын болашағына жол ашатын игі бастамаларға ұласары сөзсіз.
