Мәжілісте Қазақстан әскери қызметшілерінің дұрыс тамақтанбайтыны айтылды, деп хабарлайды kaztoday.kz.
Бұған себеп – сарбаздардың ас пайының құнын есептейтін ескі әдістеменің қолданылып келуі.
Бұл әдістеме соңғы рет екі жыл бұрын жаңартылған — 1713 теңгеден 2250 теңгеге дейін көтерілген. Алайда, депутат Айгүл Құспанның айтуынша, бұл әдістеме қазіргі таңда мүлде қолданылмайды. Егер осы әдістеменің өзін қолданса, бір сарбазға күнделікті берілетін ас пайының нақты құны шамамен 3150 теңге болуға тиіс.
Нормативке сәйкес, сарбаздар күн сайын ет, көкөніс, жеміс-жидек секілді 48 түрлі азық-түлік өнімін алуы қажет. Алайда бюджеттік шектеулерге байланысты жеткізушілер табиғи өнімдерді арзан баламаларымен алмастыруда.
«Сычужный сырды – ірімшік өніммен, сүтті – сүт қосылған өніммен, ал сары майды – бірнеше есе арзан спредпен алмастыруда», — деді депутат.
Бұл жағдай әскери қызметшілердің денсаулығына тікелей әсер етуде. 2024 жылы 30 тоннадан астам азық-түлік жеткізушілерге кері қайтарылған. Сонымен қатар келісімшарт талаптарының бұзылуы 46 пайызға жиілеген.
Депутаттың айтуынша, 2025 жылы ас пайының құнын көтеру үшін қосымша 10,2 млрд теңге қажет. Қорғаныс министрлігі бұл соманың 7,5 млрд теңгесін өз лимиттерінен жаба алатын көрінеді.
Сондай-ақ Құспан инфляцияны ескере отырып, ас пайының құнын автоматты түрде түзету механизмін енгізуді және тамақ сапасына бақылауды күшейтуді ұсынды.
«Маңыздысы – шығынды арттыру ғана емес, сол бөлінген қаражаттың толық көлемде сарбаздарға жетуін қамтамасыз ету. Әскердегі тамақтануды ұйымдастыруға бақылау ашық болуы керек. Бұл үшін „Аналар жүрегі“ сарбаз аналары кеңесі секілді қоғамдық ұйымдарды тарту және автоматтандырылған бақылау жүйелерін енгізу қажет», — деді ол.
Ал сарбаздар аш қалып, улануда деген мәселеге байланысты кім жауапқа тартылады – бұл жағы белгісіз. Себебі бұған дейін әскери қызметшілердің өз-өзіне қол жұмсауы секілді оқиғалар үшін Қорғаныс министрінің орынбасары тек ескерту алғаны белгілі.
Дереккөз: ORDA
Фото: ҚР Қорғаныс министрлігі.
