«AMANAT» партиясы депутаттары Қызылордадағы құрылыс алаңдарын аралады.

Қызылорда қаласында әлеуметтік инфрақұрылымды дамытуға бағытталған бірқатар ірі құрылыс жобаларына партиялық және депутаттық бақылау жүргізілді. «AMANAT» партиясы Қызылорда облыстық филиалы жанындағы Партиялық бақылау комиссиясының төрағасы Нұркен Бақытбекұлы, облыстық мәслихаттағы партия фракциясының жетекшісі Жорабек Нұрымбетов, депутаттар тобы мен жауапты сала мамандары қала аумағындағы маңызды нысандарды аралап, құрылыс жұмыстарының барысымен танысты.
Іссапардың негізгі мақсаты – республикалық және облыстық бюджет есебінен бөлінген қаржының тиімді әрі мақсатты игерілуін қадағалау, сондай-ақ салынып жатқан нысандардағы жұмыс сапасын бағалау болды.
Алдымен мониторинг тобы Қызылорда қаласында бой көтеріп жатқан 300 төсек-орынға арналған көпбейінді аурухананың құрылыс алаңына барды. Аталған медициналық мекеме құрамында онкологиялық бөлімшенің де қарастырылуы – өңір тұрғындары үшін сапалы әрі қолжетімді медициналық қызмет көрсетуге бағытталған маңызды қадам. Заманауи талаптарға сай салынып жатқан аурухана іске қосылғаннан кейін денсаулық сақтау саласының әлеуетін арттырып, халыққа көрсетілетін қызмет сапасын жақсартуға мүмкіндік береді.
Сонымен қатар депутаттар тәулігіне 400 келушіні қабылдауға қауқарлы №5 емхананың құрылыс барысын да көрді. Жаңа емхана пайдалануға берілген соң қала тұрғындарына алғашқы медициналық-санитарлық көмектің қолжетімділігі артып, денсаулық сақтау нысандарына түсетін жүктеме азаяды деп күтілуде.
Мониторинг барысында «Қызылорда қаласының Президент саябағын қайта жаңғырту» жобасының жүзеге асырылу кезеңдері де назардан тыс қалған жоқ. Қайта жаңғырту жұмыстары аяқталғаннан кейін саябақ қала тұрғындары мен қонақтарының демалысына арналған заманауи әрі жайлы қоғамдық кеңістікке айналмақ.
Бұдан бөлек, ботаникалық саябақ пен балалар лагерінің құрылысы кезең-кезеңімен жалғасып жатыр. 300 орынға арналған балалар лагері бүгінгі талаптарға сай жабдықталып, жасөспірімдердің сапалы демалысы мен жан-жақты дамуына қолайлы жағдай жасауға бағытталған.
Депутаттар сондай-ақ халық игілігі үшін жүзеге асырылып жатқан ірі жобалардың бірі – «Қызылорда Арена» көпфункционалды спорт кешенінің құрылысымен танысты. Бұл кешен пайдалануға берілгеннен кейін бұқаралық спортты дамытуға, халықаралық және республикалық деңгейдегі жарыстарды өткізуге, жастардың спортпен шұғылдануына жаңа мүмкіндік ашады.
Жалпы, өңірде жүзеге асырылып жатқан мұндай ауқымды жобалар Қызылорданың әлеуметтік-экономикалық дамуына серпін беріп, қаланың сәулеттік келбетін жақсартуға, тұрғындардың өмір сүру сапасы мен денсаулығын арттыруға және жайлы орта қалыптастыруға ықпал етеді.
Жауапты тұлғалар құрылыс жұмыстарының сапасы мен мерзімінде аяқталуы партиялық бақылауда болатынын атап өтті.