Ақтөбе облысында бопсалау дерегі бойынша 33 жастағы қала тұрғыны ұсталды. Күдікті 100 мың теңгені алу кезінде ұйымдасқан қылмысқа қарсы күрес басқармасының қызметкерлері тарапынан қолға түсті.
Полицияның мәліметінше, жәбірленуші әйелмен TikTok әлеуметтік желісі арқылы танысып, кейін олардың арасында жақын қарым-қатынас орнаған. Біраз уақыт өткен соң әйел өзін зорлады деген жалған арыз жазатынын айтып қорқытып, ақша талап еткен.
Ер адамның айтуынша, ол қысымның салдарынан күдіктіге алдымен 300 мың теңге берген. Кейін әйел тағы 100 мың теңге сұраған. Ақшаны алу кезінде күдікті қылмыс үстінде ұсталған.
Аталған дерек бойынша Қылмыстық кодекстің бопсалау бабымен сотқа дейінгі тергеу басталды. Қазіргі уақытта қажетті тергеу әрекеттері жүргізіліп жатыр.
Полиция азаматтарды қорқыту, бопсалау немесе заңсыз ақша талап ету фактілері орын алған жағдайда уақыт оздырмай құқық қорғау органдарына хабарласуға шақырды.
