Петропавлдағы Абай атындағы мамандандырылған қазақ мектеп-гимназиясында жөндеу жұмыстары кезінде екі қызметкер жарақат алды. Оқиға спорт залында болған.
Алдын ала мәлімет бойынша, мектепте тазалықшы болып еңбек ететін екі әйел төбені сырлау жұмысына тартылған. Жұмыс барысында олар шамамен бес метр биіктіктегі құрылыс сатысынан құлап кеткен.
Салдарынан 54 жастағы қызметкер басынан жарақат алып, аяғы бірнеше жерден сынған. Оған хирургиялық ем қажет болған. 57 жастағы екінші әйелдің кеуде және бел омыртқалары зақымданып, ол да ауруханаға жеткізілген.
Зардап шеккендердің жақындары қызметкерлерге еңбек міндетіне кірмейтін биіктіктегі жұмыстар жүктелгенін айтып, мектептің шаруашылық саласына жауапты қызметкеріне қатысты наразылық білдірген.
Солтүстік Қазақстан облыстық полиция департаментінің мәліметінше, еңбек қауіпсіздігі талаптарының бұзылуына байланысты сотқа дейінгі тергеу басталған. Қазір оқиғаның мән-жайы мен оған әкелген себептер анықталып жатыр. Тергеу қорытындысы бойынша тиісті процессуалдық шешім қабылданбақ.
