Жетісу облысының Жаркент қаласында дүкеннен бірнеше жүз шоколадты қолды қылды деген күдікпен 41 жастағы тұрғын ұсталды.
Алдын ала мәліметке сәйкес, бірнеше апта бойы сауда орнының сөрелерінен шоколадтардың жоғалып кетуі жиілеген. Соның салдарынан дүкен әкімшілігі құқық қорғау органдарына жүгінуге мәжбүр болған. Есеп бойынша келтірілген шығын көлемі 530 мың теңгеден асады.
Полиция қызметкерлері бейнебақылау камераларындағы жазбаларды қарап, күдіктінің шоколадтарды сөмкесі мен қалталарына салып, кассадан төлем жасамай шығып кеткенін анықтаған. Айғақтар көрсетілгеннен кейін ер адам өз кінәсін мойындаған.
Қазіргі уақытта аталған дерек бойынша тергеу амалдары жалғасуда. Алайда көпшіліктің көкейінде бір сұрақ тұр: жалпы құны жарты миллион теңгеден асатын 625 дана шоколад кім үшін алынған? Оның барлығы жеке тұтынуға арналған ба, әлде сату мақсатында ұрланған ба? Бұл сұрақтың жауабын тергеу нәтижесі көрсетеді.
