Таразда 2,5 миллиард теңгенің тендерін ұтқан компания ізін суытты. Жергілікті тұрғындардың айтуынша, мектеп құрылысын бастаған компания бес айдан бері ізім-ғайым жоқ. Нәтижесінде 1000-ға жуық оқушының білім алу мәселесі қиындық тудырып тұр, деп хабарлайды Kaztoday.kz.
Тараз қаласындағы №15 мектеп — гимназиясы жанынан 300 орындық қосымша ғимараттың құрылысы осы жылдың жазында басталған. Бірақ басталған іс орта жолда тұралап тұр. Жергілікті билік құрылыс компаниясының басшысын сотқа берген.
Анығы әкімшілік әмиянынан 2 млрд 500 млн теңгеге мемлекеттік сатып алу шартымен мердігер табылады. Білім ошағы құрылысқа жабылады. Сол жабылғаннан әлі күнге дейін қаңырап қалады. Сұрауын сұраған ел алапат құрылыс болса бір сәрі, қосымша құрылыстың аяғына жеткізбеген жергілікті билікке өкпелі.
«Балаларға обал болды. Ең бірінші білім сапасы. Білім сапасы төмендеп кетті қазір. 11-ді бітіретін балалар келесі жылы ҰБТ-ны қалай тапсыратынын ешкім білмейді. Ешкім жауап бермейді. Жауап бергісі де жоқ қазір. Жамбыл облысына бұл ұят нәрсе. Қосымша құрылыс 300 орындық. Соны тоқтатып қою дегенді айта алмаймын», – деп ашынады Тараз қаласының тұрғыны Мұхтар Сенбеков.
Бүгінде мектепсіз қалған балалар қаладағы үш мектепке жіберілген. Бұл қолайсыздық ата-аналардың ашуын тудырып отыр. Басқа білім ошағында үш ауысымда оқыту білім сапасына кері әсер тигізетінін айтады. Биліктен бақылаудың борпылдақ болуынан, бұқара зардап шекті дейді.
«Бұл істің нақты қашан бітерін ешкім айта алмайды. Қазір келісім-шартты бұзуға, аванстық сумманы қайтаруға сотқа бердік. Бірақ алғашқы отырысқа компаниядан ешкім келген жоқ. Сондай-ақ біз жобаға түзету енгіздік. Соған сай келісім-шарттағы суммадан 700 миллионға қысқартқанымызды айта кету керек», – деп мәлімдеді Жамбыл облыстық құрылыс басқармасының басшысы Ерлан Орымбаев.
