Есірткі жеткізіп сотталған жастар бостандыққа шығуы мүмкін, деп хабарлайды Kaztoday.kz.
Осы қылмысқа қатысты түрмеде отырған 16-30 жас аралығындағы қыз-жігіттердің саны мыңнан асады. Енді олардың жазасы жеңілдейді. Ал, есірткі бизнесінің көркін қыздырған алыптар мен оларды қорғап-қолпаштаған шенділер өмір бойына сотталады.
Бүгінде есірткіні жасырын жерге тығып жүргендердің арасында жастар аз емес. Сондықтан заңда “закладчиктерге” қатысты жазаны жеңілдетуге шешім қабылданды. Атап айтқанда, есірткі, психотроптық заттарды, сол тектестерді өткізу мақсатында заңсыз дайындау, қайта өңдеу, иемдену, сақтау, тасымалдау, жөнелту не өткізу әрекеті үшін жаза 10 жылдан 8 жылға дейін, ірі көлемде 12 жылдан 10-ға дейін, ал аса ауыр қылмыс үшін 15 жылдан 12 жылға дейін төмендетіледі. Бірақ мүлiктi тәркiлеу қосымша жазасы ретінде қалады.
Ал есірткі бизнесін ұйымдастырушылар мен есірткі, психотроптық заттар мен сол тектестерді өндірушілер үшін жаңа 297-1-бапп енгізіледі. Олардың жазасы ауыр болады. Бас бостандығынан айыру мерзімі өмір бойына дейін ұлғайту арқылы күшейтіледі.
Жаңа бапта қызмет бабын пайдаланып қылмыс жасаған лауазымды тұлғалар үшін де жаза қарастырылған. Оған сәйкес, кінәлі адамның мүлкі тәркіленіп, он бес жылдан жиырма жылға дейін немесе өмір бойына бас бостандығынан айырылады.
«Бұдан басқа, құрамында есірткі бар, өсіруге тыйым салынған өсімдіктерді қылмыстық топпен және аса ірі мөлшерде заңсыз егіп-өсіргені үшін қылмыстық жауапкершілік болады. “Заңда Қылмыстық кодекстің 301-бабын толықтыру арқылы, елдің ішінде күшті әсер ететін заттардың заңсыз айналымы мен өндірісі үшін жауапкершілік белгілеу көзделеді. Қолданыстағы Қылмыстық кодекс нормаларына сәйкес, қазіргі уақытта олардың контрабандасы үшін ғана жауапкершілік қарастырылған», – дейді сенатор Наурызбай Байқадамов.
Денсаулық сақтау министрлігінің мәліметінше, 19 мыңға жуық адам есірткіге тәуелділік бойынша есепте тұр. Оның жартысынан астамы жасөспірімдер. Ал, есепке ілінбегендердің саны 200 мыңнан асып кеткен. Жыл басынан бері Қазақстанда 60-қа жуық зертхана жойылған.
ІІМ қатайтылған заңды қолдайтынын және күшейтілген режимде жұмыс жасайтынын жеткізді.
«Есірткіні заңсыз пайдаланғаны үшін жазаның бұлтартпастығын қамтамасыз етуге ықпал ету тетіктерін күшейтуге және қоғамда нашақорлықтың алдын алуға неғұрлым сапалы деңгейде мүмкіндік береді. Құқық қолдану практикасында Қылмыстық кодекс болсын, немесе Әкімшілік кодекс нормаларын қолдануда ешқандай проблемалар болмайды», – деді ҚР ІІМ орынбасары Санжар Әділов.
