Биыл 54 мың қазақстандық кедейлік шегінен шығып, өмір сүру деңгейін жақсартты. Осыған байланысты атаулы әлеуметтік көмек алушылардың саны азайды, деп хабарлайды Kaztoday.kz.
Бұл туралы ktk.kz-ке ҚР Еңбек және халықты әлеуметтік қорғау министрінің орынбасары Олжас Анафин айтты.
– 2023 жылы 114 мың отбасына 57 миллиард теңге көлемінде атаулы әлеуметтік көмек берілсе, биылғы 11 айда 76 мың отбасы бұл көмекті алды. Жыл сайын мемлекеттен қолдау алатын адамдардың саны азайып келеді, – деді Олжас Анафин.
Бұл жетістік аз қамтылған отбасыларға көрсетілетін кешенді әлеуметтік қолдаудың нәтижесі болып отыр. Вице-министрдің айтуынша, келісімшарт жасау тетігін енгізудің арқасында еңбекке жарамды 16 мың адам биыл жұмыспен қамтылған.
Алайда атаулы әлеуметтік көмекке мұқтаж аймақтар әлі де бар. Түркістан, Алматы және Жамбыл облыстарында барлық әлеуметтік төлемдердің 62 пайызы төленеді. Сонымен қатар, мемлекеттен қолдауға қалалықтар ауыл тұрғындарына қарағанда көбірек мұқтаж екені анықталды.
