ҚР Бас прокуратурасы жәбірленушінің өліміне әкеп соққан ауыр дене жарақатын келтіргені үшін Қазақстан азаматын Ресей Федерациясынан экстрадициялады, деп хабарлайды Kaztoday.kz.
Бұл туралы Бас прокуратураның баспасөз қызметі хабарлады.
Хабарламада айтылғандай, күдікті 2021 жылдың наурыз айында Қостанай қаласында ауыр қылмыс жасаған. Ол жәбірленушімен бірге алкогольдік ішімдік ішіп отырған кезде туындаған жанжалдың салдарынан жәбірленушінің басы мен денесіне ауыр соққылар жасап, оның өліміне себепкер болған. Қылмыстық жауаптылықтан қашу мақсатында күдікті оқиға орнынан қашып кетіп, халықаралық іздеуге жарияланған.
Іздеуде жүрген уақытта күдікті Ресей аумағында қарақшылық шабуыл жасағаны үшін ұсталып, сол елдің сотымен сотталған. Ресейде жазасын өтегеннен кейін Қазақстан Республикасының Бас прокуратурасы күдіктіні экстрадициялау туралы өтініш жолдады. Өтініш қанағаттандырылып, ол Қазақстанға қайтарылды. Қазіргі уақытта күдікті тергеу изоляторына қамалған.
Қылмыстық кодекске сәйкес, жәбірленушінің өліміне әкеп соқтырған ауыр дене жарақатын келтіргені үшін күдіктіге 8 жылдан 12 жылға дейін бас бостандығынан айыру жазасы қарастырылған.
