Құрылыс компаниясының қызметкері 1,8 млрд теңге қаржы жымқырып ұсталды, деп хабарлайды kaztoday.kz.
Қаржылық мониторинг агенттігінің Шығыс Қазақстан облысы бойынша департаменті құрылыс компаниясының қаржы жымқырған әрекетіне тосқауыл қойды. Мекеменің топ-менеджері көппәтерлі тұрғын үй кешенін салу желеуімен 1,8 млрд теңгены қалтасына баспақ болған.
Агенттіктің мәліметінше, Өскеменде екі күдікті тұрғын үй құрылысына үлескер ретінде 102 адаммен келісім-шарт жасаған. Бірақ нысан келісілген мерзімде аяқталмаған. Тіпті уақыты бірнеше рет ұзартылып, тұрғын үй құрылысы тоқтап қалған.
«Қазір күдіктілер соттың санкциясымен қамауға алынды. Тергеу барысында олардың 2,3 млрд теңге көлеміндегі мүлкіне тыйым салынды. Зардап шеккен азаматтарға қаражаттарын қайтару жұмыстары жүргізіліп жатыр», — делінген хабарламада.
