Ақтөбе қалалық соты бюджет қаржысын жымқыру, заңсыз қару-жарақ сақтау және терроризмді насихаттау ісі бойынша сот үкімін жариялады, деп хабарлайды kaztoday.kz.
Тұрғынның гаражынан қару-жарақ арсеналы табылды
Тергеу мәліметінше, Ақтөбе қаласының тұрғындары М.Сағындықов пен М.Дьяченко белгісіз дереккөздерден 12 түрлі атыс қаруын және оқ-дәрілерді сатып алған. Олар:
- АК-103 автоматтары – 2 дана;
- «БОРЗ» пистолет-пулеметі;
- «ТТ» және «ПМ» пистолеттері;
- Макаров пистолеттерінің бірнеше модификациясы;
- 4 аңшы мылтығының кесілген бөлігі;
- «STOEGER», «Mossberg» көп зарядты мылтықтары;
- «ВПО-209» аңшылық карабині және басқалары.
Қару-жарақтың арасында жарық-шу гранатасы, үш жарылғыш пакет және байланыс құралдары болған. Оқиға орнынан 100-ден астам оқ-дәрі табылды.
Бұл арсенал Михаил Дьяченконың гаражында сақталған. ҰҚК қызметкерлері Сағындықовты басқа іс бойынша тексеру барысында осы қаруларды тапқан.
Террористік ұйым «Аль-Каиданы» мадақтайтын дәрістер тыңдаған
Сағындықов интернеттегі радикалды мазмұндағы материалдарды, оның ішінде тыйым салынған террористік ұйым «Аль-Каиданы» мадақтайтын Абдуллах Қостекскийдің дәрістерін тыңдаған. Тергеу материалдарына сәйкес, ол радикалды салафиттік джихадистік идеологияға негізделген идеяларды ұстанып, терроризмді насихаттаған.
Сағындықов діни көзқарасын қолдамағандарды «қарумен қорқытып, қырып-жоюды» насихаттаған. Ол тіпті чаттарда:
- «Радикалдар митингке шықпайды, олар бірден АК-мен шығады»,
- «Тағут ғимараттарын митинг кезінде өртеп жіберуге болады» деген хабарламалар таратқан.
Сағындықов танысы Гарбузға «қолдан қару алып, әйелді өлтіру» туралы бұйрық берген. Гарбуз оның ұсынысынан бас тартқан соң, Сағындықов «нағыз мұсылманның міндеті – қарумен дінсіздерді жою» деп мәлімдеген.
Дьяченко қару-жарақтың гаражында сақталғанын мойындағанымен, оны кездейсоқ тапқанын айтқан. Оның сөзінше, қарулар екі үлкен сөмкеде болған, ол бұл сөмкелерді қоқыс контейнерінің жанынан тауып, гаражға апарып қойған.
Алайда сот оның түсініктемесін сенімсіз деп тапты.
Үкім
- Малик Сағындықов: 9 жылға бас бостандығынан айырылды.
- Михаил Дьяченко: 5 жылға бас бостандығынан айырылды.
Үкім әлі заңды күшіне енген жоқ.
