Таразда білім ұйымы 36 баланы заңсыз оқытқан, деп хабарлайды kaztoday.kz.
Тараз қаласы прокуратурасы кәмелетке толмаған балалармен жұмыс істейтін білім беру мекемелерінің қызметіне жан-жақты тексеру жүргізген. Тексеру барысында «Бәйдібек» қайырымдылық мекемесінің 2023 жылдан бастап тиісті лицензиясыз білім беру қызметін жүзеге асырғаны анықталды. Білім беру мекемесінде санитарлық-эпидемиологиялық талаптардың сақталмаған. Көші-қон және өрт-техникалық нормалардың және еңбек және сәулет-құрылыс ережелерінің бұзылуы белгілі болған. Мекемеде лицензиясыз 36 бала білім алып келген.
Тексеру нәтижесінде Тараз қаласының прокуроры Жамбыл облысының мамандандырылған ауданаралық экономикалық сотына аталған мекемені тіркеуден шығару және оның қызметін тоқтату туралы талап арыз берген.
2024 жылдың 8 қазанында Жамбыл облысының мамандандырылған ауданаралық экономикалық соты:
- Мекеменің қызметін тоқтату;
- Тарату;
- Есептік тіркеуден шығару туралы шешім шығарды.
Сот шешімі заңды күшіне енді.
Тараз қаласының прокуратурасы білім беру саласындағы заң бұзушылықтарды болдырмау мақсатында заңды тұлға құру және лицензиясыз білім беру қызметін жүзеге асыру заңсыз екенін ескертеді. Осындай фактілер анықталған жағдайда, қатаң шаралар қабылданады.
