Кінәлі деп танылған бұрынғы шекарашы алты жылға бас бостандығынан айырылды, деп хабарлайды Kaztoday.kz.
2023 жылы 22 шілдеде Жамбыл облысының «Жауғаш батыр» шекара отрядында қызмет атқарған ефрейтор Азат МЕДРАЛЫ мемлекеттік шекарадан заңсыз көлік колоннасын өткізуге қатысы бар деген айыппен ұсталды. Бұл іс Шымкент гарнизонының әскери сотында қаралып, кінәлі деп танылған бұрынғы шекарашы алты жылға бас бостандығынан айырылды.
RATEL.KZ мәліметінше, тергеу барысында анықталғандай, 2023 жылдың 22 шілдесіне қараған түні шекарашы Медралы белгісіз тұлғамен («Арман» есімді адам) байланысқа шығып, бірнеше жеңіл және жүк көлігін шекарадан заңсыз өткізуді ұйымдастыру үшін 5 миллион теңге алуға келіседі. Сол күні ол күзетке түсіп, өз қарамағындағы екі сарбазды шекара бойын тексеруге жіберіп, өзі өткізу пунктінде қалады.
Түнгі уақытта Қырғызстаннан Қазақстанға қарай фараларын қоспастан бірнеше көлік үлкен жылдамдықпен шекарадан өтеді. Шекарадағы басқа сарбаздар күдікті жағдайды байқаған соң дереу рация арқылы штабқа хабарлайды. Олар оқиға орнына оралғанда, Медралының көліктердің дөңгелек іздерін жасыру үшін жерді сыпырып жатқанын көреді.
Құқық қорғау органдарының араласуымен, тек бір жүк көлігі – “КамАЗ” тоқтатылды. Оның ішінен жалпы құны 120 миллион теңгеден асатын 156 550 қорап құжатсыз темекі табылған. Қалған көліктерді тоқтату мүмкін болмады.
Шымкент гарнизонының әскери соты Азат Медралыны билікті асыра пайдаланғаны және шекара күзетінің ережелерін бұзғаны үшін кінәлі деп таныды. Оған алты жыл бас бостандығынан айыру жазасы тағайындалып, әскери атағынан айырылды. Сонымен қатар, ол өмір бойы мемлекеттік қызметте жұмыс істеу құқығынан айрылды. Контрабандалық темекі жойылуға жатқызылды.
Айыпталушы Медралы өз кінәсін тек ішінара мойындады. Ол оқиға болған күні шаршағандықтан қызметте ұйықтап қалғанын, ал көліктердің өтіп жатқанын көргенде, қатты қорқып, іздерді жасыруға тырысқанын айтты. Алайда, оның бұл айтқандары тергеу мен сот барысында толықтай теріске шығарылды.
Фото: flectone.ru.
