Маңғыстауда 20 тонна тәркіленген мұнай өнімдері сатылмай қалды, деп хабарлайды Kaztoday.kz.
Электрондық сауда алаңында лот ретінде 20 220 килограмм мұнай өнімдері 17,4 миллион теңге бастапқы бағамен сатылымға қойылды. Алайда оларды сату әзірге мүмкін болмады.
Мұнай өнімдері 2021 жылдан бері қоймада сақтаулы. Олар жазда тәркіленген. Ол кезде құқық қорғау органдары «CaspiOilGas» ЖШС-ға тиесілі «Ракушечное» кен орнында HOWO маркалы автоцистерна жүк көлігін тоқтатқан. Цистернада рұқсат құжаттары жоқ 20 тонна мұнай болған.
Тергеу нәтижесінде заңсыз өндірілген мұнайдың аффилиирленген заңды тұлға – «SumatecOil&Gas» ЖШС арқылы сатылғаны анықталды. Өндірілген шикізат «VOID» ЖШС-да өңделген.
Іс аясында сот тәркіленген мұнай өнімдерін сату туралы тергеу өтінішін қанағаттандырды. Олардың сатылымынан түскен қаражат Маңғыстау облысы экономикалық тергеулер департаментінің есепшотына аударылуы тиіс.
