Қаңтар айының ортасында павлодарлық кәсіпкерлер Өзбекстанға ірі көлемде картоп жөнелткен, алайда жүк шекарада кідіріп қалған, – деп хабарлайды Kaztoday.kz.
КТК хабарлағандай, Сарыағаш станциясында 43 вагон картоп он күннен астам уақыт тұрып қалған. Барлық құжаттар экспортқа тыйым салынғанға дейін-ақ рәсімделген.
Жүк фитосанитарлық тексеруден өткізу үшін тоқтатылған. Алайда тексеру ұзаққа созылып, осы уақыт ішінде картоп қатып, кейін еріп, шіріп кеткен.
– «Әкімдік бұл картопты 100–150 теңгеден сатуды сұрады, ал қазіргі нарықтағы бағасы 300 теңгеден басталады. Мен не істерімді білмеймін. Барлық шығынды өзім көтеріп отырмын. Үш вагоннан 60 миллион теңге жоғалттым», – деп ашынады кәсіпкер.
Ауыл шаруашылығы вице-министрі Ербол Тасжүреков бұл жүктің стандартты тексеру процедурасынан өткенін мәлімдеді. Оның айтуынша, қазір ешкім картопты ұстап отырған жоқ, оны сатып алушыға жеткізуге болады.
Алайда кәсіпкерлердің айтуынша, бұл картопты енді сатып алушыға жібере алмайды, тіпті малға жем ретінде де пайдалану мүмкін емес.
