Жезқазғанда аса ауыр қылмыс жасаған екі азамат 20 жылға бас бостандығынан айырылды. Үкім Ұлытау облысының қылмыстық істер жөніндегі мамандандырылған ауданаралық сотында алқабилер алқасының қатысуымен шығарылды, деп хабарлайды Kaztoday.kz.
Айыпталушылар С. мен Д.-ға ҚР Қылмыстық кодексінің 99-бабы 2-бөлігі 3 және 7-тармақтары бойынша («Адамдар тобының алдын ала сөз байласуымен, дәрменсіз күйдегі адамды өлтіру») айып тағылды.
Сот барысында анықталғандай, 2025 жылғы 29 қаңтарда Жезқазған қаласындағы пәтерде ішімдік ішкен үш адамның арасында жанжал туындап, соңы қанды қылмысқа ұласқан. Мас күйдегі жәбірленуші Б.-ны айыпталушылар пышақтап өлтіріп, кейін денесін бөлшектеп, қоқыс контейнеріне тастаған.
Сотта ұсынылған дәлелдер мен сараптамалар айыпталушылардың кінәсін толық дәлелдеді. Прокурор оларды өмір бойына бас бостандығынан айыруды сұраған. Алайда алқабилердің үкімі негізінде әрқайсысына қауіпсіздігі орташа мекемеде 20 жыл жаза тағайындалды.
Жәбірленушінің туысы – азаматтық талап иесіне 5 000 000 теңге моральдық және 535 995 теңге материалдық өтемақы өндіру шешімі шықты.
«Сотталушылардың әрекеттері ерекше қатыгездікпен жасалған. Олар қылмысты мас күйінде, дәрменсіз адамға қатысты жасаған. Бұл – ауырлататын мән-жайлар. Алқабилер үкімі негізінде қатаң жаза тағайындалды», – делінген сот хабарламасында.
