3 ақпан күні Орал іргесіндегі 12 мыңдай адам тұратын «Құс фабрикасы» саяжайының халқы электр жарығының ажыратылуына, оның төлемдерінің реттелмегеніне наразылық танытып, жолды жауып тастады, деп хабарлайды Kaztoday.kz sarapshy.infо-ға сілтеме жасап.
Қауымдастықтың қазіргі төрағасы Асхат Әнесұлы тұрғындарың ереуілге шығу себебіне байланысты пікір білдірген. Оның сөзінше, бұған дейінгі төраға РЭК-ке ақша төлемей келген.
– Қазіргі халықтың көтеріліп жатқан себебі – РЭК-ке («Батыс Қазақстан аймақтық электр желілік компаниясы» ЖШС) осы аудан тұрғындарының жарыққа бережақ болғаны. Маған дейінгі тағайындаған төраға Асылбек Қабесов ақшаны РЭК-ке төлемей келген. Қазіргі кезде 71 млн болған. Олар келді де жарықты өшіріп тастады. Ал мен ақшаны төлеп үлгерген жоқпын. Маған төле деп жатыр. Мені әлі РЭК-пен келісімшартқа отырған жоқпын, — деген қауымдастық төрағасы.
Бүгінде аудан тұрғындарының «Батыс Қазақстан аймақтық электр желілік компаниясы» ЖШС-ына қарызы 71 млн теңгеге жеткен. Сол себепті таңертеңгі сағат 11:00-ден бастап жарықты өшіріп тастаған. Бұл ауданда шамамен 2200-ден астам үй бар.
Ашынған тұрғындар осы уақытқа дейін электр энергиясының ақшасын ауданның бұрынғы төрағасы Асылбек Қабесовтың Kaspi нөміріне аударып отырғанын айтуда. Тіпті серіктестік төрағасы отырған кеңсеге барып, қолма-қол төлеп жүрген.
Бау-бақша серіктестігі болып саналғандықтан, мұнда 1 кВт/сағ электр энергиясының құны — 1 кВт үшін 32,60 теңге. Ал Орал қаласы бойынша орташа тариф — 28,16 теңге.
