Петропавлда ҰҚК қызметкері «Борат» интернет-дүкенінің «закладчигі» ретінде ұсталды, деп хабарлайды Kaztoday.kz.
9 ақпанға қараған түні Петропавлда Солтүстік Қазақстан облыстық Полиция департаментінің Есірткі қылмысына қарсы күрес басқармасы қызметкерлері Қазақстан Ұлттық қауіпсіздік комитетінің Шекара қызметінің кіші сержанты, 37 жастағы Б.Қ.-ны ұстады. Бұл туралы ZTB NEWS редакциясына құқық қорғау органдарындағы ақпарат көзі хабарлады.
Құқық қорғау органдарының мәліметінше, шекарашы Астанадан Петропавлға «Борат» атты республикалық интернет-дүкеннің есірткі тасымалдаушысы ретінде жұмыс істеу үшін келген. Алайда кезекті рейсі кезінде оны есірткі қылмысына қарсы күрес басқармасының қызметкерлері ұстады.
Тексеру барысында оның автокөлігінен:
🔹 шамамен 10 грамм белгісіз зат оралған түйіншек,
🔹 жалпы салмағы 520 грамм болатын екі «зиплок» пакетіне салынған ұнтақ,
🔹 салмағы шамамен 10 грамм болатын өсімдік тектес екі түйіншек табылды.
Барлық тәркіленген заттар сараптамаға жіберілді.
Қазіргі таңда полиция ҚР Қылмыстық кодексінің 297-бабы 1-бөлігі («Есірткі құралдарын заңсыз дайындау, өңдеу, сатып алу, сақтау, тасымалдау немесе өткізу мақсатында жөнелту») бойынша сотқа дейінгі тергеу амалдарын жүргізіп жатыр. Тергеушілер істің мән-жайын анықтап, оған қатысы бар басқа да тұлғаларды тексеруде.
