Шымкенттегі Антикордың экс-басшысының ісіне қатысты жаңа деректер шықты, деп хабарлайды Kaztoday.kz.
Шымкентте Сыбайлас жемқорлыққа қарсы қызмет департаменті басшысының бұрынғы орынбасары Дәуренбек Қожабаевқа қатысты сот процесі жүріп жатыр. Ол аса ірі көлемде пара алғаны үшін айыпталуда.
Тергеу мәліметтері бойынша, Қожабаев мектеп директорына қылмыстық жауапкершіліктен құтылуға көмектесемін деп, одан ірі көлемде пара алған. Бұл жемқорлық әрекет ақырында жоғары лауазымды шенеуніктің сот алдында жауап беруіне әкелді.
2022 жылдың қыркүйегінде Шымкент қаласындағы №132 мектептің директоры Улсуер Каштанова 1 миллион теңге пара алған кезде ұсталды. Антикор аталған дерек бойынша қылмыстық іс қозғады.
Каштанова жазадан құтылудың жолын іздеп, таныстары мен туыстары арқылы департамент басшысының орынбасары Дәуренбек Қожабаевқа шыққан. Ол мектеп директорына көмектесуге келісіп, істі сотқа жеткізбеу үшін 60 миллион теңге талап еткен.
«Келесі кездесуде ол Каштанова ісін сотқа жеткізбей жабу үшін 60 миллион теңге беру керегін айтты. Сол күні Раушан Құлымбетова Каштанованың үйіне барып, бұл ақпаратты жеткізді», – деп көрсетілген тергеу материалдарында.
Мектеп директоры 42 миллион теңге жинап, оны Қожабаевқа танысы Раушан Құлымбетова арқылы берген. Жемқорлық схемасында делдал болған Құлымбетова қызметі үшін 1 миллион теңге «сыйақы» алған.
«Осыдан кейін Құлымбетова бірнеше рет Қожабаевпен кездесіп, оның Каштанова мәселесін шешетінін нақтылаған. Алайда 2023 жылдың қарашасында Құлымбетова Қожабаевтың қызметінен кеткенін білді», – делінген хабарламада.
Қазір сот процесі жалғасып жатыр.
