Құқық қорғаушы Айман Умарованың хабарлауынша, Жауғашты елді мекеніндегі әйелдер түрмесінде 17 бала ауырып қалған, олардың үшеуі ауыр жағдайда ауруханаға жедел жеткізілген, деп хабарлайды kaztoday.kz.
Балалардың аналары колонияда қалып қойған.
«Бұл – балалар мен олардың аналарының құқықтарын өрескел бұзу деп есептеймін. Аналар балаларын, әсіресе жансақтау бөлімінде жатқан балаларын бірге алып жүруі керек еді. Бізге айтқан сылтауы – аналарды балаларымен бірге ауруханаға алып баруға конвой қызметкерлері табылмаған. Бұл – мүлде жол беруге болмайтын жағдай», — деді Айман Умарова.
Құқық қорғаушы Алматы облысының прокуратурасын, Бас прокуратураны, Ішкі істер министрлігі мен Денсаулық сақтау министрлігін шұғыл түрде арнайы комиссия құруға шақырды.
«Неге бір мезетте сонша бала ауырып қалды – бұл кездейсоқ жағдай емес. Не инфекция, не улану. Әйел тұтқындар мен олардың балаларының денсаулығына Денсаулық сақтау министрлігі жауапты. Медициналық көмек пен конвой мәселесінде неге проблема туғанын анықтау қажет», — деп атап өтті Умарова.
Бұл жағдайға байланысты Алматы облысының денсаулық сақтау басқармасы мәлімдеме жасап, 14 баланың ауырғаны туралы ақпарат расталмағанын хабарлады.
«26 наурызда арнайы прокурор, денсаулық сақтау басқармасы басшысының орынбасары, ҚАЖ қызметі мен санитарлық-эпидемиологиялық бақылау мамандары колонияны тексерді. Балалар сау», — делінген хабарламада.
Басқарманың мәліметінше, балалар үйінде 63 жазасын өтеп жатқан әйел баласымен бірге тұрады, олардың 14-і – еңбектеп жүрген жас тобындағы балалар.
«22-23 наурыз күндері үш бала Іле аудандық ауруханасының жұқпалы аурулар бөліміне энтеровирустық инфекция диагнозымен жатқызылды. Жағдайлары – орташа ауырлықта, оң динамика байқалады. Бір бала алғашында жансақтау бөлімінде болған, кейін инфекциялық бөлімге ауыстырылды. Қазір екі бала аналарының жанында, біреуі – анасы ем қабылдап жатқандықтан, медбикемен бірге», — делінген басқарма ақпаратында.
Балалар үйіндегі барлық бала тексеруден өткен, ауру белгілері анықталмаған.
Бұған дейін Мәжіліс депутаты амнистия аясында екі мыңнан астам әйел бостандыққа шығуы мүмкін екенін хабарлаған болатын.
Дереккөз: ORDA
Фото: Pixabay.
