Жамбыл облысындағы бес кәсіпкер Айша-бибі кесенесінің жанындағы техникалық нысандарды заңсыз иемденіп, сол жерде бизнес жүргізген, деп хабарлайды kaztoday.kz.
Айша-бибі кесенесі қарасты «Ежелгі Тараз ескерткіштері» музей-қорығы бұл нысандардың өздеріне тиесілі екенін айтып, оларды қайтаруды талап етіп, сотқа жүгінді. Ал кәсіпкерлер болса, бұл ғимараттарды 2010 жылы салған кәсіпкер оларға тегін бергенін мәлімдеген.
«Жауапкерлердің сауда жасауға рұқсаты да, бұл нысандарды кәсіпкерлік мақсатта пайдалану туралы құжаттары да болмаған. Талапкер тарихи-мәдени музей-қорық аумағында сауда жасауға тыйым салынғанын да атап көрсетті. Сотта төрт кәсіпкер ғана талапты мойындады», — деп хабарлады Жоғарғы соттың баспасөз қызметі.
Сот шешімі бойынша, кәсіпкерлер аталған нысандарды босатуға міндеттелді, өйткені олар музей-қорықтың меншігі болып табылады. Апелляциялық шағым да нәтижесіз болды.
Дереккөз: ORDA
