Спорт мектебінде жаттығу кезінде 6 жасар баланың басына шам құлап түсті, деп хабарлайды kaztoday.kz.
2025 жылғы 13 мамырда Қостанай ауданының балалар-жасөспірімдер спорт мектебінде жаттығу кезінде 6 жасар бала Арлан Исмагуловтың басына шам құлап түсті.
Оқиға спорт мектебіндегі балуандар тобында болды. Арлан Исмагулов жаттығу кезінде жүгіріп жүргенде топтағы бір бала допты қатты теуіп жіберіп, ол төбедегі шамды қағып кеткен. Шам құлап, Арланның басына тиіп, оның бас терісі жарылып кеткен.
– Күйеуіме телефон соғып, баланы тез алып кетуін сұраған. Ол барған кезде Арлан қанға малынған күйде болған, бала қатты қорқып, жылаған, – дейді анасы Гүлім Исмагулова HALYQSTAN тілшісіне берген сұхбатында. – Біз шұғыл түрде облыстық балалар ауруханасына барып, ол жақта жараға тігіс салынды. Қазір бейсенбі таңында тағы хирург қабылдауында отырмыз, кезегімізді күтіп отырмыз.
Арланның ата-анасы бұл оқиғаны мектеп ғимаратының құрылысындағы және ішкі әрлеу жұмыстары кезіндегі қателіктермен байланыстырады. Егер шамдар доп жететін жерде орналасса, мұндай жағдайлар тағы да қайталануы мүмкін деп алаңдайды.
Қостанай ауданы, Тобыл қаласындағы спорт мектебінің директоры Дамир Ахтямов қазір сырттағы жарыстарда жүргендіктен, пікір алу мүмкін болмаған. Мектеп меңгерушісінің де ұялы және стационарлық телефондары жауап бермейді.
Исмагуловтар отбасы кінәлілерді анықтап, олардың жауапкершілігін белгілеуді талап етпек. Сонымен қатар, олар спорт мекетебінің ғимараты балалар үшін жеткілікті қауіпсіз бе деген мәселені де көтермек.
