Қазалы ауданында балалардың құқықтарын қорғау, жасөспірімдер арасындағы құқық бұзушылықтың алдын алу және білім беру ұйымдарындағы қауіпсіздікті күшейту бағытында маңызды көшпелі комиссия отырысы ұйымдастырылды. Аталған жиын М.Матаев атындағы №170 мектеп базасында өтіп, оған аудан әкімдігі жанындағы кәмелетке толмағандардың істері және олардың құқықтарын қорғау жөніндегі комиссия мүшелері қатысты.
Комиссия отырысына Қазалы ауданы әкімінің орынбасары Даурен Тлеумбетов, аудандық прокуратураның прокуроры Еркебұлан Қанатбек, аудандық полиция бөлімі бастығының орынбасары Ғанибек Құрманалиев, сондай-ақ сала басшылары мен жауапты мекеме өкілдері қатысты.
Жиынның негізгі мақсаты – кәмелетке толмағандардың арасында құқық бұзушылықтың алдын алу бағытындағы атқарылып жатқан жұмыстарды саралау, өзекті мәселелерді талқылау және алдағы кезеңге нақты міндеттер айқындау болды.
Күн тәртібінде бірнеше маңызды мәселе қаралды. Атап айтқанда, М.Матаев атындағы №170 мектепте оқушылар арасындағы құқық бұзушылықтың алдын алу бағытында атқарылып жатқан жұмыстар мен алдағы жоспарлар талқыланды. Сонымен қатар, Қазалы ауданындағы жасөспірімдер арасында құқық бұзушылық профилактикасы, кәмелетке толмағандарға қарсы жасалған қылмыстардың жай-күйі, білім беру ұйымдарында тәртіпті сақтау мен оқушылар қауіпсіздігін қамтамасыз ету мәселелері кеңінен сөз болды.
Отырыста комиссия мүшелері күн тәртібіндегі мәселелер бойынша өз пікірлерін білдіріп, ұсыныстарын ортаға салды. Балалардың қауіпсіздігі мен құқықтарын қорғау ісінде барлық мүдделі мекемелердің өзара байланысын күшейту қажеттігі айтылды.
Жиынды қорытындылаған комиссия төрағасы, аудан әкімінің орынбасары Даурен Оңғарбайұлы бүгінгі таңда көтерілген мәселелердің маңыздылығы жоғары екенін атап өтті. Ол балалардың қауіпсіз ортасын қалыптастыру, құқық бұзушылықтың алдын алу және жас ұрпақтың болашағы үшін мемлекеттік органдар мен білім беру ұйымдары бірлесе жұмыс істеуі тиіс екенін жеткізді.
Сондай-ақ, комиссия барысында көтерілген мәселелер бойынша жауапты сала басшыларына нақты тапсырмалар жүктеліп, олардың орындалуын бақылауда ұстау қажеттігі тапсырылды.
Айта кетейік, мұндай көшпелі комиссия отырыстары өңірдегі білім беру ұйымдарында профилактикалық жұмыстарды жандандырып, балалар құқығын қорғау бағытындағы жүйелі шараларды күшейтуге мүмкіндік береді.
