Атырау облысында аса ірі көлемде қаражат жымқырғаны үшін сотталған бухгалтердің жазасын рақымшылық негізінде қысқарту туралы шешімнің күші жойылды. Бұл туралы Бас прокуратура мәлімдеді.
Бұған дейін 88,8 млн теңгені иемденген бухгалтер 7 жылға бас бостандығынан айырылған. Кейін сот оған рақымшылық туралы заңды қолданып, жаза мерзімін 4 жыл 8 айға дейін азайтқан.
Алайда қадағалаушы орган бұл шешімнің заң талаптарына сәйкес келмейтінін анықтап, наразылық білдірген. Істі қараған кассациялық сот прокурордың уәжін негізді деп тауып, рақымшылық қолдану жөніндегі шешімнің күшін жойды.
Заң талаптарына сәйкес, аса ірі мөлшердегі жымқыру үшін тағайындалған жазаны рақымшылық арқылы жеңілдету үшін келтірілген материалдық залал толық өтелуі қажет. Ал сотталған азамат шығынды түгел қайтармаған.
Қазіргі уақытта өтелмеген залал көлемі 36,8 млн теңгені құрайды.
