Петропавлда әлеуметтік желіде жариялаған жазбаларына байланысты қылмыстық жауапкершілікке тартылған 50 жастағы Арман Ахметовке сот үкімі шықты. Ол діни алауыздықты қоздырды деп танылып, алты жылға бас бостандығынан айырылды.
Айыптау тарапының мәліметінше, ер адам әлеуметтік желіде діни тақырыпқа қатысты бірнеше жазба жариялаған. Тергеу бұл жарияланымдардан діни алауыздықты қоздыру белгілерін анықтаған. Іс барысында оның ислам діні мен Мұхаммед пайғамбарға қатысты айтқан пікірлері де қаралған.
Сот процесінде айыпталушының құқығын екі адвокат қорғады. Қорғаушылар іс материалдарына қосымша баға беру үшін тағы бір соттық дінтану сараптамасын өткізуді сұрады. Алайда сот бұл өтінішті қанағаттандырған жоқ.
Сондай-ақ сот отырысында прокуратура мен сотталушы арасында процестік келісім жасау мәселесі көтерілген. Дегенмен айыптаушы тарап мұндай келісімге бару туралы ұсынысты қабылдамады.
Істі қарау қорытындысында сот Арман Ахметовті діни алауыздықты қоздыруға қатысты тағылған айып бойынша кінәлі деп танып, 6 жыл мерзімге бас бостандығынан айыру жазасын тағайындады.
Қазіргі уақытта сот үкімі заңды күшіне енген жоқ.
