Шұбаркөл кен орнынан алынған көмірді заңсыз сатып келген «Modern Trading Solutions» тауар биржасының басшылығы тек пара берген адамдарға ғана сауда жасауға мүмкіндік берген, деп хабарлайды Kaztoday.kz.
ҚМА хабарлауынша, биржа басшылары 23 брокерлік компанияны өздерінің туыстары мен сенімді адамдарының атына тіркеп, көмір саудасына тек тұрақты түрде ақша беретін кәсіпкерлерді ғана жіберген.
Егер кәсіпкерлер пара бермесе, онда:
— Аккредиттеу мерзімі әдейі ұзартылған
— Мәмілелер жасалмаған
— Саудаға қатысу мүмкіндігі шектелген
— Сауда нәтижелері жойылған.
Бұл әрекеттер жылу беру маусымы қарсаңында көптеген шағымдарға және әлеуметтік шиеленіске әкелді.
Қылмыстық топтың жылдық заңсыз табысы 2 миллиард теңгеден асқан. Бұл қаражат олардың бақылауындағы компаниялар арқылы қолма-қол ақшаға айналдырылып отырған.
Үш биржа басшысына қатысты қамауға алу түріндегі бұлтартпау шарасы қолданылды, ал осы іс бойынша тағы бір күдікті халықаралық іздеуге жарияланды.
