Қазақстанда 15 млрд теңге көлемінде қаржылық пирамида құрған басты күдікті қашып жүрген кезінде Қырғызстанда кісі өлтіріп, кейін экстрадицияланды, деп хабарлайды Kaztoday.kz Қазақстан Республикасы Бас прокуратурасының баспасөз қызметіне сілтеме жасап.
«Қазақстан Республикасының Бас прокуратурасы Қырғыз Республикасынан Қазақстан азаматын қылмыстық жауапкершілікке тарту үшін экстрадициялады. Ол трансұлттық ұйымдасқан қылмыстық топ құрамында қаржылық пирамида құру және оны басқару бойынша айыпталуда. Аталған топ 2017-2020 жылдар аралығында Қазақстан аумағында QI-Trade қаржы пирамидасын ұйымдастырып, 4 700-ден астам салымшының 15 млрд теңгеден астам қаражатын заңсыз иемденген», – делінген дүйсенбі күні таратылған хабарламада.
Бас прокуратураның мәліметінше, қылмыстық топтың кейбір мүшелері сотталып, әртүрлі жазаға тартылған. Ал басты күдікті қылмыс жасағаннан кейін жасырынғандықтан, оған халықаралық іздеу жарияланған.
«Іздеуде жүрген күдікті Қырғызстан аумағында кісі өлтіру қылмысын жасап, қырғыз сотымен сотталған. Қазақстан Республикасының Бас прокуратурасының сұрауы бойынша, ол уақытша Қазақстанға экстрадицияланды. Қаржылық пирамида құру және оны басқару бойынша сот үкімі шыққаннан кейін Қырғыз Республикасына қайта жіберіледі. Осылайша, күдікті Қазақстан аумағында жасаған қылмысы үшін жауапқа тартылғаннан кейін, көрші елдегі қылмысы үшін де жазасын өтейтін болады», – деп түсіндірді Бас прокуратура.
Қылмыстық кодекске сәйкес, аталған қылмыстар үшін 12 жылға дейін бас бостандығынан айыру және мүлкін тәркілеу жазасы қарастырылған.
«Бұған дейін Бас прокуратура осы қылмыстық топтың екі мүшесін Ресей мен Польшадан экстрадициялаған болатын. Олар сотталып, әртүрлі мерзімге бас бостандығынан айырылды», – деп мәлімдеді қадағалаушы орган.
Фото: ҚР БП баспасөз қызметі
