Шымкентте сот төрешісінің отбасына қоқан-лоқы көрсеткен ер адам 2 жылға сотталды, деп хабарлайды Kaztoday.kz.
Шымкент қаласының қылмыстық істер жөніндегі мамандандырылған ауданаралық сотының судьясы мен оның отбасы мүшелері қауіп-қатерге тап болды. Өткен жылы бұл судья 27 жастағы азаматтың ірі көлемде есірткі және психотроптық заттарды заңсыз сатуға қатысты қылмыстық ісін қараған болатын. Сот тергеуі, іс материалдары, куәгерлер мен сарапшылардың айғақтары негізінде айыпталушының кінәсі толық дәлелденіп, ол 12 жылға бас бостандығынан айырылған еді.
Алайда сот үкімі шыққаннан кейін сот төрағасы «қара белгі» алды. Бұл қоқан-лоқы сотталушының бостандықта қалған жақын досынан келгені анықталды.
Сот процесі барысында да бұл азамат бірнеше рет сотқа қысым көрсетуге тырысты. Ол сот залына мас күйінде келіп, сот төрағасын балағаттаған, тіпті сот хатшысын ұруға әрекеттенген. Соңында оны күзет қызметкерлері залдан шығарып жіберген.
Осы оқиғалардан кейін ол белгісіз жолмен судья мен оның отбасы мүшелерінің, соның ішінде оның кіші ұлының телефон нөмірлерін тауып, оларға хабарласуды бастаған. Судьяға қоңырау шалып, оның әйелі мен үш баласын білетінін айтып, «бәріне қиын болады» деп ескерту жасаған. Кейін ол судьяның әпкесіне және кіші ұлына да қоңырау шалып, соңғысына кездесуге ұсыныс жасаған. Ұлы кездесуден бас тартқаннан кейін, WhatsApp арқылы ауыр салдары болуы мүмкін екендігі туралы хабарламалар жібере бастаған. Сонымен қатар, ол судьяны сотталған досының кінәсіздігіне сендіріп, «әділ шешім» шығаруды талап еткен.
Сот үкімін жариялау кезінде бұл азамат залға кіруге кешігіп, оған кіруге рұқсат берілмеді. Сол себепті сот процесі аяқталғаннан кейін ол прокурорды күтіп алып, сотталушының 12 жылға бас бостандығынан айырылғанын білген соң: «Енді менің ойыным басталды» деген сөз айтқан. Бұл сөздерді прокурор мен сот қызметкерлері анық естіген.
Судьяға қауіп төніп тұрғанын түсінген сот қауіпсіздік қызметі оған полицияға шағым түсіруді ұсынды. Судья бұл ұсынысты қабылдап, құқық қорғау органдарына арыз жазды. Осыған байланысты Қылмыстық кодекстің 409-бабы, 1-бөлігі («Судьяға немесе оның жақындарына олардың сот төрелігін жүзеге асыруына байланысты өлтіру немесе денсаулыққа зиян келтіру туралы қоқан-лоқы көрсету») бойынша қылмыстық іс қозғалып, күдікті ұсталды.
Шымкент қаласының мамандандырылған ауданаралық қылмыстық соты бұл істі қарады. Сотталушы – 1998 жылы туған Дінмұхаммед Н., бұрын сотталмаған, бойдақ, жеке кәсіпкер. Сот-медициналық және психиатриялық сараптамаларға сәйкес, оның есірткі немесе басқа да тәуелділігі жоқ, психикалық денсаулығы қалыпты.
Дінмұхаммед өз кінәсін мойындамады. Ол өзін «дұрыс түсінбегенін» айтып, ешкімге қоқан-лоқы жасамағанын мәлімдеді. Оның айтуынша, «бәріне қиын болады» деген сөзін ол тек өзіне және сотталған досына қатысты айтқан. Сондай-ақ, ол досының бала кезінен қиын өмір сүргенін, анасынан айырылғанын, ал әкесі басқа отбасыға кетіп қалғанын айтып, оның есірткіге еш қатысы жоқ екенін түсіндіргісі келгенін жеткізді. Судьяға және оның әпкесіне бұл туралы айтқысы келген, бірақ ойын дұрыс жеткізе алмағанын мойындады.
Ал «енді менің ойыным басталды» деген сөзіне қатысты сотталушы бұл тек апелляциялық шағым беру ниетін білдіргенін, ешқандай кек алу жоспары болмағанын алға тартты.
Алайда сот оның бұл уәждерін қабылдамады. Үкім бойынша, Дінмұхаммед Н. екі жылға бас бостандығынан айырылды. Дегенмен, сотталған азаматтың бұл шешімге қатысты апелляциялық шағым түсіруге құқығы бар.
