Түркістанда экс-шенеуніктер ірі көлемде бюджет қаражатын жымқырғаны үшін сотталды, деп хабарлайды Kaztoday.kz.
Түркістан қалалық соты 14,9 миллион теңге бюджет қаражатын жымқыру ісі бойынша үкім шығарды.
Антикордың мәліметінше, кінәлі деп танылғандар – облыстық табиғатты пайдалану және табиғи ресурстар басқармасына қарасты «Жасыл аймақ» КММ-нің бұрынғы басшысы Бегасилов, оның орынбасары Ерназаров, заңгер Айнабекова және кәсіпкер Муслимов.
Қылмыстық іс материалдарына сәйкес, олар сапасы мен техникалық сипаттамаларына сай келмейтін арзан пестицидтер мен гербицидтер (зиянкестер мен арамшөптерге қарсы құралдар) сатып алған.
Нәтижесінде, Бегасилов 2,5 жылға бас бостандығынан айырылды. Ерназаров, Айнабекова және Муслимов 2 жылға бас бостандығын шектеу жазасын алды. Барлығы өмір бойына мемлекеттік қызметте және квазимемлекеттік секторда жұмыс істеу құқығынан айырылды.
Үкім әлі заңды күшіне енген жоқ.
